وان طال السفر - محمد عبدالماجد

[ود سورتود]

نشرت: 31/07/2010 - 12:27 عدد رقم 6801
•




< عندما كنا نهم بكتابة موضوع انشائي عن (المسرح) في المدرسة او في الصحف الحائطية كنا نمعن في ان تكون مداخلنا في تلك النواحي ، هو قولنا ( اعطني مسرح اعطيك امة) .. كان القول هذا هو (الفرمالة) لنا في كل حديث عن المسرح .

< حتي عندما بدأنا نكتب في الصحف ، مارسنا الفضيلة نفسها : (اعطني مسرح اعطيك امة). ومازلنا نكتب العباراة حتي الان والدليل اني اكتبها الان مرتين في مدخل ومقدمة لا تتجاوز كلماتها (100) كلمة.

< وهنالك ثوابت لا مفر منها. مثلاً أي لاعب بقول بدأت كرة القدم بي (كورة الشراب) ، وهذا (حنك) ساكت بنسمع بيه من زمن (جكسا) الي زمن (النعيم رونالدينو).

< واللاعب ايضا يقول بعد التسجيل انه هلالابي او مريخابي (حسب التسجيل) منذ (نعومة اظافره) ، رغم انهم ولدوا باظافر خشنة وما فيها أي نعومة.

< في السودان أي لاعب عندما يسجلوه للهلال بقول : انا هلالابي منذ نعومة اظافري.

< اللاعب نفسه لو اتسجل في المريخ بقول : انا مريخابي منذ نعومة الظافري ...وفي هذا الحديث (كذب) واضح لأن فطرة أي انسان هو ان يكون بشجع الهلال.

< واللاعب في السودان ايضا عندما يشطبوه بقول : سمعت نبأ شطبي في عالم الرياضة. طبعا الزمن داك (عالم الرياضة) هو الوسيلة الوحيدة للحصول علي المعلومة. قبل توسع الصحف ووكالات الانباء وخدمات مواقع النت والخدمات المخصصة من بعض الجهات عبر الـ (sms).

< هسع في ايامنا دي (الخبر) يجبوه ليك قبل ما يحصل.

< طبعا الاعلام الرياضي مستعجل شديد. المضحك في امر تسجيلات اللاعبين هو ان اللاعب اصبح يدفعوا فيه (مليار) جنيه ..وتقرأ له في اليوم الثاني حوارا يقول فيه انه لن يساوم ..وانه علي استعداد علي الامضاء علي بياض.

< لكن علي منو؟. المشجع ذاتو بقي (مفتح). اللاعب من التسخينة بعرفو ليك قابض كم؟. هسع (حقوق) سادومبا ظاهرة في جريتو. سادومبا دا يوم يقبض بفتح ليك زي (الريح). يوم ما يعطوه قروشو بكون زي المربط.

< طبعا سادومبا ما غلطان. غلطان مجلس ادارة نادي الهلال...اللاعب عاوز حقو ..وفي تعاقد بين الطرفين يجب ان يحترم. عليه أي لاعب ما يأخذ حقو ...بتمرد.

< انتوا ما شفتوا سفاري عمل شنو؟. سفاري قالوا ليك بقي يصرج الكورة في شبكتو. بالمناسبة الليلة انا بتوقع سفاري يسجل ليه هدف عكسي في شبكتو.

< اسمعوا كلامي دا. الليلة سفاري بعملها في المريخ.

< زول 5 شهور ما ح يقبض ..يتعب ليكم ليه.

< المشكلة سفاري عريس...وشينة من ناس جمال الوالي 5 شهور ما يعطوه قروش. ليه؟..شغال في منظمة تتطوعية.

< يا سفاري قلت ليك لو احتجت لي حاجة (مسكل) لي خليفة.

< خليفة ما بقصر معاكم. خليفة ما قاعد يتلوم. حاشهو العيب.

< ما علينا. الموضوع دا لو فتحنا فيه بجر. احسن نشوف الموضوع الاساسي.

< نعود الي المسرح ، وهو الفن الاقدم تاريخاً والاكثر تأثيراً علي الشعوب باعتباره صاحب قدرة علي التأثير اجتماعيا وسياسيا في الدولة.

< المسرح السوداني يحتفظ بمكانته وله الكثير من الدلال علي المتلقي السوداني ، وهو قد لعب دورا كبيرا في خارطة الثقافة السودانية وله ايادي بيضاء علي كل ضروب الحياة. مكي سنادة ، يأتي كعلامة واضحة في معالم المسرح السوداني وهو من القلائل الذين وضعوا لانفسهم اسلوب خاص ، يتميز به عن الاخرين.

< هسع مكي سنادة ذنبو شنو؟. مكي سنادة عندو دخل بي (سفاري).

< تتخيلوا اول مواجهة بين سادومبا وسفاري يحصل شنو؟.

< اول مواجهة بين سفاري وسادومبا بقعدوا يعملوا جرد حساب...الاثنين حالتهم صعبة. يعني سادومبا بشوت برة الشبكة (قصد) يقوم سفاري يلحق الكورة برة ويدخلها في الشبكة. يعني الخسران المريخ.

< خسارة شنو؟. كورتكم دي هسع بشمعوها ليكم.

< الفيفا ما بتخليكم. نرجع للمسرح...الكورة اصلها ح يجمدوها ليكم ح يجمدوها. مكي سنادة استطاع ان يخلط بين التراجيديا والكوميديا في ادواره التي قدمها علي خشبة المسرح.

< غير ذلك فان مكي سنادة تستطيع ان تتحسس هيبته وقدرته في الاذاعة او في التلفزيون او حتي في السينما وان ندر ذلك نسبة لان السينما فن لا وجود له في الخارطة الفنية السودانية. مع ذلك فهنالك فيلم يغني عن الكثير من الافلام وهو فيلم (بركة الشيخ) الذي قدم فيه مكي سنادة دور يجعلك تسحب كل الاراء السلبية في حق الممثل السوداني. مكي سنادة ممثل بامكانيات فرقة مسرحية كاملة فيها التراجيديا والكوميديا ، لذلك انت تجد كل الالوان التمثيلية عند مكي سنادة.

< مثلما قلنا ان فيلم (بركة الشيخ) علامة واضحة في دنيا الافلام السودانية ، فاننا نقول كذلك ان (خطوبة سهير) هي اشهر الاعمال المسرحية التي قدمت علي مسرح سوداني.

< مسرحية (خطوبة سهير) رغم السنوات الطويلة التي مرت علي عرضها إلا انها تبقي في الذاكرة السودانية .

< خطوبة سهير مسرحية خالدة مثلها مثل (مدرسة المشاغبين وعش المجانين والود سيد الشغال وشاهد ماشافش حاجة والعيال كبرت) في جمهورية مصر ، وربما نجد ان (خطوبة سهير) تتفوق علي كل هذه المسرحيات في (السبكة) الدرامية العالية.

< هنالك ايضا لمكي سنادة علامة اذاعية هامة ، وهي مسلسل (الحراز والمطر) ونلحظ من خلال ذلك ان كل الاعمال التي يشارك فيها مكي سنادة يمنحها صك التميز ويجعلها اعمال خالدة عند الناس.

< كذلك لمكي سنادة قدرات عبقرية في الاخراج وان كنا نعطل امكانيات مكي سنادة بعدم الاستفادة منها.

< مكي سنادة ممثل يجب التوقف عنده ، واذا كانت هنالك مسرح عرف بانه مسرح الرجل الواحد فانه يمكننا هنا نقول ان (مكي سنادة) هو رجل السرح الاوحد.

< ملحوظة: ان شاءالله مكي سنادة يبقي ليكم رئيس نادي يا ناس الهلال.

هوامش

< عندما يجلسان سوياً ولا يجدان موضوعاً يتحدثا فيها كانا يتحدثا عن (الطقس). والجو .. وحالة الطقس.. اجزم ان كثير من قصص الحب بدأت منهما .. الليلة (الواطة) سخنة.

< الليلة السما شايل. وامس ما شفت (الكتاحة) دي كانت كيف؟.

< والخرطوم دي ما عندها قدرة للمطرة.

< عندنا (صالون) من يسمع النشرة الجوية بقعد يرجف.

< ناس الارصاد الجوي ديل بتحدثوا ساكت. كل اسبوع يقولوا (المطر) ح تجي يوم الاربعاء القادم. هي مطر وإلا فيلم اجنبي.

< زمان طبعا السهرة في التلفزيون يوم الاربعاء فيلم اجنبي.

< كنا بنقعد ننتظر السهرة دي من يوم السبت. وقت السهرة تبدأ بتشيلنا نومة. زي العريس المشي يجيب العروس من الكوافير ...لقي الكورة شغالة في الكافتريا المجاورة للكوافير...باع ليك القضية ...ونسي ليك (العروس).

< سادومبا جاب ليه قون ...العريس نسي موضوع الكوافير نهائي ..طلع ليك مع الهلالاب في مظاهرات صاخبة.

< واحد مريخابي (كابس) شاف ليك العريس في المظاهرة بي حنتو...استغرب وقال كمان يا الهلالاب (القون) بقيتوا تتحننوا ليهو.

< نرجع لي موضوع (الطقس).

< المشكلة انتوا بتخرجوني من الموضوع براكم.

< هما كانا في بدايات قصة حبهما يجلسان فيتحدثان عن (الطقس).

< وهي باتسامة (نصفية) تختزل (الربيع) عندها .. فيشرع صاحبنا في الحديث عن (الربيع) ، باعتباره فصلاً لم يكن مبرمجاً في خارطتنا الطقسية.

< لذلك (الخريف) عندنا مشحون بالتفاصيل ، وهو يفتح لكل العاشقين الف موضوع ، وموضوع.

< يحتشد بتعبيرات مختلفة. المطر عندنا كدا .. انتوا (مطرتكم) كيف؟.

< الليلة الكتمة دي جايبة ليها مطرة.

< امس جاتنا (مطرة)...زي (البشكير) نضفت لينا (الطابق).

< من ثم المواضيع تفتح .. والونسة تجر. ناس المريخ طبعا عندهم عقدة من (المطرة). من تجيب ليهم (المطرة) بضايروا...تقول شغال في (الولاية).

< انتوا يا مريخاب في الخريف تقولوا (المطر).

< في الشتاء ..تقولوا (البرد). في الصيف تقولوا (الارضية كعبة).

< نعملكم شنو نحن.

< عشان كدا المريخاب ماسكين في حكاية (الموسم مقلوب). مقلوب كيف يعني؟.

< يعني محمد كمال بشوف (سادومبا) ماشي علي رأسو.

< كاسروكا دا قالوا ليك شيء يشوف وشيء ما يشوف.

< اكرم مسكين ...جابوا ليه (الحصوة) وشطبوه.

< مرت ذكري رحيل (عبدالعزيزالعميري) دون ان نحتفي بشخصية كان مستودع فني. ممثل .. ومخرج ومولف . وشاعر .. ومغني.

< زول كان مؤسسة فنية . لكن مع ذلك وجدت بعض الكلمات عن العميري في بعض الصحف. قلت برضو ما في عوجة.

< برنامج كواليس رياضية في قناة الشروق يناقش قضايا رياضية حية ومباشرة ويملك مقدمه قدرات جيدة في ادارة الحوار...لكن للاسف الشديد البرنامج توقف.

< كل يوم فنانة جديدة .. حتي ان عافية حسن بقت عندنا قديمة مثل ام كلثوم.

< حرم النور ..بقت من المخضرمات.

< يا جماعة انتوا الحصل شنو؟. بتاع قندران دخل ليه (حيطة).

< الحيطة قامت بعد 45 دقيقة ..وقالت انتوا البلد دي ما فيها ادارة مرور.

< هسع بتاع القندران ذنبو شنو؟. بتاع القندران عيشتو تطير.

< توشك ان تحسب ان قناة الجزيرة تبث .. برامجها من بيتكم.

< قناة دخلت في التعمق في التفاصيل السودانية.

< قناة النيل الازرق مازالت تتفوق علي كل القنوات السودانية الاخري بنقاء الصورة وجمال الديكور.

< قناة قوون ...ماشي صاح ...وننتظر الكثير من القناة الرياضية الاولي في السودان.

< تسيس المدائح ، وسيلة مرفوضة لغاية مرفوضة.

< يسرا ينتظر منها تألق اخر في رمضان القادم.

< المسلسلات المصرية اصبحت تحاصرها المسلسلات السورية والمسلسلات التركية.

< سمعنا بي مخبز تركي .. وتمدد الامر ابعد من ذلك فاصبحت مسلسلاتنا نفسها تركية.

< الشارع السوداني .. اصبح ذو طابع تركي.

< الثقافة المصرية تراجع تأثيرها علي المواطن السوداني حتي في الدراما.

< يبدو ان مصر لن تنافس باكثر من ام كلثوم .. وفي رواية اخري والاهلي المصري ايضاً.

< بخيل يضني حتي (بالمسكول).

< يتحدث في السياسة .. ومسلسل نور.

< عنده رأي في الحزب الديمقراطي الامريكي .. وفي ماسورة الجيران الدائمة ضاربة.

< بسمع ام كلثوم وعبدالحليم حافظ .. وكلام زوجته.

< خبر عاجل : يا محمد كمال اعمل حسابك من سفاري ...الزول دا احتمال يصرج الكورة.